تحليل السكر التراكمي

تحليل السكر التراكمي HbA1C

اذا كنت مريض سكر فأكيد طبيبك طلب منك قبل كده تعمل تحليل السكر التراكمي , أو (الهيموجلوبين السكري) أو على الأقل سمعت عنه بالنسبه للتحليل ده فهو تحليل مهم جدا وشائع جدا وبيتعمل للكبار والأطفال لتشخيص مرض السكر.

التحليل ده بيطلبو الطبيب المعالج عشان يعرف مدي انتظام نسبه السكر فى الدم فى اخر تلات شهور فاتت.

التحليل ده بيقيس نسبه الهيموجلوبين اللى شايله كده بالبلدي سكر فى دمك, واللى ميعرفش الهيموجلوبين - الهيموجلوبين ده عباره عن أحد مركبات الدم اللى نقصها بيسبب أنيميا وبتكون موجوده داخل كرات الدم الحمراء فى مجري الدم.

نرجع تانى للسكر التراكمي زى ماقولنا انه بيقيس نسبه السكر المحموله على الهيموجلوبين فى الدم وكل ماتزيد نسبه الهيموجلوبين السكري بيدي مؤشر ان السكر عندك مش مضبوط أو بمعني أصح انت مش مسيطر عليه أو مش مصاحبه :)) .

طيب يعني ايه الكلام ده... معناه أنك السكر عندك بيكون مرتفع باستمرار وان حضرتك معرض بدرجه كبيره لمضاعفات السكر.

طيب ممكن الطبيب يطلب مني التحليل ده وانا لسه مش متشخص ان عندي سكر؟؟!! الاجابه أيوه لأنه ممكن يطلبو لو حضرتك عندك أعراض ماقبل السكر ولو طلعت النتيجه مرتفعه فحضرتك أكثر عرضة للاصابة بمرض السكر.

كمان لو حضرتك بالفعل مريض سكر فنتيجه السكر التراكمي بتساعد الطبيب انو يعرف السكر اللى عند حضرتك من النوع الأول ولا التاني (طبعا بالاضافه الى تحاليل اخري) .

مش بس كده.... لو حضرتك بالفعل بتاخد دوا للسكر فنتيجة السكر التراكمي بتساعد الطبيب على معرفة العلاج اللى بتاخدو ده فعال معاك ومؤثر فى ضبط نسبه السكر فى الدم ولا لاء.

فلو حضرتك عندك اعراض ماقبل السكر هتحتاج تعمل التحليل ده مره كل سنه , ولو حضرتك مريض سكر من النوع التاني وبتاخد علاجك بانتظام ونسبه السكر فى الدم معقولة فى الحدود المسموحة هتحتاج تعمل التحليل مرتين فى السنة, أما لو حضرتك مريض سكر من النوع الأول فهتحتاج تعمله مره كل تلات شهور.

التحليل بسيط وبيتاخد عن طريق عينة دم من الوريد ولايحتاج صيام.

فى الحقيقه التحليل ممكن يتأثر ببعض المشاكل اللى بتأثر على نتيجة التحليل زى مثلا لو حضرتك عندك انيميا(نقص هيموجلوبين) عشان زى ماقلنا الهيموجلوبين هو اللى شايل السكر اللى بنقيسو فى التحليل ده :)).

معدل السكر التراكمي

بالنسبه للأشخاص الطبيعين(مش مريض سكر) بتتراوح النسبه من 4% - 5.6%.

أما بالنسبه لمريض السكر فالمفروض انه بيحافظ على النسبه أقل من 7% عشان ميبقاش معرض لمضاعفات مرض السكر.

دمتم بصحه وسعاده,,,, أذا كان عندكم أى استفسار رجاء ارساله فى رساله على الصفحه أو لو فى مقترح أو موضوع حابين نتكلم فيه لاتترددو فى مراسلتنا . وليصلكم كل ماهو جديد تابعونا على المدونه بالضغط على زر متابعة أعلى يمين المدونة و شكرا لحسن متابعتكم .